唔少上市地產公司嘅董事局，除咗家族成員，好多都係賣樓出身，好似恒地（00012）咁，尋日就公布委任地產發展部嘅總經理黃浩明（Augustine）做執行董事，真係恭喜賀喜。恒地披露佢嘅基本薪金同其他福利每個月53.318萬元，絲絲計一計，即係年薪639.8萬元（仲未計每年董事袍金7萬元）。
根據恒地舊嘅年報，Augustine嘅年薪僅次於主席李兆基（四叔）、佢兩位公子同副主席林高演，當然啦，絲絲睇緊嘅係舊年嘅人工，今年加薪之後，唔知排名有冇變呢？
計埋Augustine在內，依家集團個董事局一共有13位執董，真係一圍枱食飯都要加位，但正所謂人多好辦事，相信佢嘅加入，將可提升集團嘅實力。Augustine張履歷表一啲都唔簡單，佢係註冊專業測量師，擁有超過25年嘅地產估值、買賣同發展經驗，○八年佢仲獲特區政府委任做太平紳士添。
有咁厚資歷，唔好以為佢好老，今年只係49歲，絲絲記得佢喺九六年加入恒地，一年後已經做咗集團附屬恒基兆業執董。早前四叔趁端午節假期巡視旗下中半山麥當勞道17號嘉苑，Augustine有份陪伴左右，足見佢嘅地位幾高。
余絲韻