香港嘅銀行同業拆息咁低，令到銀行一直都打緊減價戰，絲絲去幫襯銀行時，都會貨比三家，貫徹香港人精打細算嘅精神，安永會計師事務所就做咗個調查，原來香港零售銀行啲客，唔夠忠誠，仲話銀行淨係減價吸新客，建立唔到客戶關係。
安永遠東區金融服務首席合夥人包凱（Keith Pogson）話，香港銀行好睇重點樣吸新客，但係又無鼓勵一個忠誠嘅銀行客戶買多啲產品，銀行要投放多啲資源落去回報依家已有嘅客戶。
調查結果顯示，84%香港人都無試過，或者唔打算換佢哋用開間銀行，但係71%嘅香港人都會用其他銀行嘅產品。
Keith仲話，依家銀行係咁減價搶新客，盞搞到啲客轉嚟轉去，而唔係同銀行建立關係，銀行其實有晒啲客戶嘅資料，應該做多啲個人化嘅服務，因為銀行收費同服務始終都係兩回事，而唔係咩產品都推晒畀啲客㗎。
佢仲舉個例向銀行「教路」，話銀行既然知道客戶嘅大日子，寄吓生日卡都好吖。不過，依家銀行業減價成風，Keith覺得情況短期內都好難改變。
余絲韻