絲絲講場：卓悅夥攜程網吸內地客
卓悅（00653）尋日宣布同攜程旅行網合作推出貴賓卡，買嘢有折。兩間公司業務看似九唔搭八，不過睇真啲，內地客為卓悅帶來唔少盈利，今次同攜程合作，執行董事陳志秋話未來希望內地客佔業務比例可以由三成五升至五成。
十‧一黃金周備戰
攜程旅行網嘅營銷副總裁湯瀾，一開場就大讚卓悅，話卓悅係男人嘅最愛，點解呢？皆因次次佢來香港，太太都會交張list畀佢要佢買化妝品，佢去卓悅，只要交張單畀sales，自然會有人幫佢執齊晒，所以今次都揀同卓悅合作，希望喺香港拓展攜程網嘅品牌。其實想打開喺香港嘅知名度，上市係其中一個好方法，攜程又有冇咁嘅打算呢？湯瀾就笑笑口話冇。
嚟緊就到「十‧一」黃金周，卓悅同攜程合作吸自由行客，咁卓悅又有冇計過會帶來幾多收益呢？陳志秋話冇計過，不過通過攜程嚟香港嘅旅客每月有成五萬名，相信申請貴賓卡嘅人好快到十萬人。查實內地客嘅單價有五百元至六百元，高過本地客嘅一百元好多，現時內地客佔業務三成五，本地客佔六成五，佢話希望數年後兩者各佔一半。
余絲韻