女賓架做生意就衝鋒陷陣，但遇到一啲感性事件，其柔性嘅一面真係表露無遺，恒生（00011）副董事長兼行政總裁梁高美懿係好典型例子。
恒生每年同「再生會」合辦「十大再生勇士選舉」，呢個選舉好有意義，所以引起社會各界關注。原來恒生已經贊助呢項活動多年，但對於舊年先由滙豐調到恒生掌舵嘅梁高美懿嚟講，今年都係第二年參與其中。
唔好睇梁太平時叱咤商界流露嘅女強人風範，其實佢為人好感性，話說佢舊年傾聽一班再生勇士分享抗病經歷時，真係聽到眼濕濕。
呢個選舉已經去到第十四屆，梁太話，見到每一位再生勇士憑着頑強鬥志同埋不屈不撓嘅奮鬥精神，以及家人及朋友嘅鼓勵與支持，活出好似彩虹咁精彩嘅人生，希望今年呢個活動可以繼續為社會注入更多正能量。
梁太仲話，由於深受感動，所以當再生會今年再搵恒生贊助時，二話不說就應承咗。另外，梁太尋日面對一班歷屆得獎者時，似乎感觸良多，佢亦提到早前發生馬尼拉挾持人質事件，藉此勸勉大家珍惜生命。
余絲韻