港股高位整固，游資十分活躍，昨日翻炒零售股，本欄於上周推介的堡獅龍（00592），整固兩日後又再發力，曾高見0.86元，埋單報0.84元，升9%。
講開配股，近期唔少上市公司趁旺市集資，但集資後股價表現都唔錯，就如瑞聲聲學（02018）宣布配股後14元任你買，昨日曾高見16.7元，收報16.52元，升7.97%，相信今浪可向18元推進。
此外，下周內地中秋節有數天假期，炒家睇準機會炒起內地消費股，好似價位細細粒容易食的中國七星購物（00245），昨日曾炒高至0.154元，收報0.139元，升7.75%，成交股數達到2.09億股，全日平均成交價為0.146元。
老實講，論往績此股冇咩好講，只係單純睇住交投短炒則尚可。上周五一支大陽燭成交急增，周一抖氣過後，昨日再開車，企在50日線樓上收市，似要突破去年末季的下降軌，跟炒目標睇250日線0.169元，穿0.12元止蝕。
古晨