市場熱線：粵投有望重返高位

經過八月份大插水，踏入九月份，花旗魚缸只有一個交易日下跌，其餘日子全部上升，係咪成功扭轉上月劣勢，古勝烏卜卜，皆因仍要觀察公布的經濟數據不再有差池。最麻煩係資金流入債市，魚缸交投淡靜，係投資者睇淡經濟的一個訊號。加上本周五是花旗魚缸四期結算同埋祖國魚缸股指期貨結算，估計各地魚缸更趨波動。

雖然上周五本地魚缸在花旗ADR表現麻麻，祖國移動（00941）更跌逾1%，但祖國周末公布的通脹數據尚算溫和，人行未有搵「息魔」出動的需要，預期祖國魚缸回升，可帶動本地魚缸做好。

至於錢莊股預期會個別發展，缸邊友擔心上周五國際銀行業監管機構，在「十字旗國」巴塞爾舉行會議，或會實行更為嚴格的控制銀行風險與資本水平措施。

本地魚缸上周表現平平無奇，但有個別板塊被追捧。本地零售股輪流落鑊，偷步炒黃金周概念；另新能源股、汽車股跟醫藥股亦有買盤掃貨，上周五醫藥股表現尤其標青。

國務院日前通過扶持7大新興產業，包括節能環保、新一代資訊技術、生物、高端裝備製造、新能源、新材料以及新能源汽車。相對今年三月產業名單，「生物醫藥」被「生物」取替，其實醫藥行業並未被剔出名單，提法變動反而係內容更加廣泛，及更具針對性。

有意再收購資產

粵海投資（00270）上周五股價回升，公仔圖表顯示股價在3.8元有不俗支持，在下認為係上車時候。粵投股價近期表現落後，跟集團決定押後分拆酒店業務上市有關。不過，集團旗下9間酒店在今年首四個月的入住率，表現持續改善，押後分拆係因為本地魚缸表現欠佳有關，並唔係酒店業務本身有問題。

睇番粵投主要業務，來自供水業務為集團主要收入，盈利表現一向相當穩定。粵投已向有關當局申請調高水價，現正在等待審批結果，一旦落實，又會成為股價炒高藉口。

粵投○九年的現金跟銀行結餘為38.7億元，資本負債率由41%降至23%，可見現金流相當強勁。粵投見手頭鬆動，有意向阿媽購入水廠、電廠及酒店等項目。現價市盈率估值不算高，吸納作中線投資，下跌風險有限，重返高位指日可待。

戰報

五礦資源（01208）+21%

本月三日桃桃推介五礦資源時，當日低位只有3.49元，上周五股價高見4.24元，累升21%。

合景泰富（01813）+7%

古勝上周一指合景泰富未到價，上周五一度升上6.22元，較推介當日低位5.81元累升7%。

古勝