中資投行「一哥」中金飽受人才流失之苦，除咗首席經濟學家哈繼銘過檔高盛做投資銀行部董事總經理，佢哋呢幾個月大大話話有成三十多名高級僱員被外資投行撬走。有市場消息話，引發跳槽潮嘅主因係中金允許員工將所持嘅中金「虛擬股權」套現。
虛擬股權通常係企業對中、高級管理人員授予嘅激勵機制，員工可享受分紅，但並無所有權及表決權，一般唔可以轉讓或出售，仲會喺離開公司時自動失效。消息透露，中金嘅「虛擬股權」薪酬體系，所涉股權高達公司總價值嘅兩成，依家允許部分員工將所持虛擬股權套現，令佢哋就算另謀高就都唔使放棄太多嘢。
余絲韻