網上拍賣商eBay與阿里巴巴集團理論上應該係死對頭，但阿里巴巴一年一度嘅網商大會就邀請咗eBay總裁約翰‧多納霍（John Donahue）嚟演講，阿John竟然喺人哋嘅地頭，幽咗馬雲一默，話希望喺十年內令到馬雲「高一啲」。
事緣喺大會嘅尾段，有現場觀眾問十年後兩人會做乜嘢？John話希望令到馬雲高一啲；馬雲亦冇嬲，只係話十年後，希望有一半時間可以休閒咁享受陽光與海灘，另外一半時間可以出錢做慈善活動，仲有佢最希望可以返學校教書，如果完成晒所有心願，做人就可以話係無憾。
馬雲話佢生意上嘅夢想，係見到未來世界有九成半商家利用互聯網採購及銷售，八成人會依靠網絡買嘢，換句話講，實體店舖嘅重要性會愈嚟愈低，為咗盡快達成呢一步，不得不跟eBay呢個最大競爭者合作。
余絲韻