絲絲講場：馬化騰自認推銷「渣」
「做人冇夢想，咁同條鹹魚有乜分別？」騰訊（00700）主席馬化騰當年可能就係唔想做「鹹魚」，先搵埋幾位志同道合嘅朋友創辦騰訊，點知呢隻「企鵝」咁勁揪，○四年仲喺香港上埋市，依家市值約達3,000億元，成績有目共睹。難怪佢尋日出席「中大創業周」講座時，同啲大學生講「創業，讓我們離夢想更近」，各位學生哥，有辦你睇。
「三人行，必有我師焉」，馬化騰話當年自己主要研發互聯網技術，但推銷技巧就非常差，所以之後搵咗屬於公關能手嘅股東加入。佢笑言：「每次他聽完我說話，都會把我的話說得更好聽，所以那時候我的名片寫工程師，他的名片就寫老總，讓他去跟投資者做推銷。」
「微創新」基礎上發掘
有同學問馬化騰對於外界話騰訊「只模仿，不創新」有乜睇法？佢輕鬆回應：「微軟及谷歌都不是最早的發明，只是你們不知道它們抄襲誰吧！而我提出的是『微創新』，意指在基礎上再發掘新東西，能超越對手。」回顧當年騰訊來港上市，佢話：「當年我希望騰訊能夠成為香港的龍頭股，怎料在○八年就被納入恒生指數成分股，沒想到願望成真。」
余絲韻