淘寶網喺七月份實施咗新嘅搜索排序規則，引發唔少中小賣家嘅不滿及抗議，新規則加入咗賣家服務態度、退款及投訴等內容，結果變成排喺前面嘅多數係商城用戶，中小賣家認為對佢哋好唔公平，生意難做，仲話網站更改規則前應該事先諮詢。為咗咁樣，幾十個賣家喺上月底圍堵淘寶網杭州總部，要求恢復以前嘅排序方式。
對於今次嘅風波，阿里巴巴（01688）主席兼CEO馬雲就寫咗封長達2,300字嘅信回應，話畀大家知公司會企硬及力挺新規則，又話從來都唔會因為利益而改變自己，仲話「寧可關掉公司也不會放棄原則」！
馬雲話今次嘅調整係基於數億名消費者嘅利益、支持優質服務及誠信賣家嘅決策，對於公司嘅好意被曲解感到好失望，而且更唔會接受一啲別有用心或片面嘅意見，佢仲話即使有更激嘅手段出現，公司都唔會讓步屈服；佢最後呼籲同事：「阿里人，為理想而戰」。對於馬主席堅持將消費者利益放喺第一位，作為消費者嘅絲絲當然亦都好支持，至於淘寶網改革嘅成效，我哋就要拭目以待嘞！
余絲韻