絲絲講場：渣打力吸「進富一族」
近期唔少銀行都着意搶佔消費力強嘅年輕人市場，渣打（02888）早前就做咗個「三十五歲前最想做到的五件事」調查，發現最多年輕人想「買樓」及「錢搵錢」，另外有八成半人希望三十五歲時有一百萬元以上嘅身家。
新服務攻年輕才俊
渣打稱呢啲月入二萬至五萬元、有二十萬元以上身家、大部分介乎二十五至四十歲嘅年輕才俊為「進富一族」。渣打銀行尊尚個人銀行集團總監胡美霞話，「進富一族」係佢哋亞洲市場中增長潛力最龐大嘅一群，仲預計至二○一三年增加兩成至八千六百萬人，單係香港嘅「進富一族」就有成一百二十五萬人。為咗吸納呢批客戶，渣打針對佢哋嘅需求及生活模式，推出Preferred Banking服務。
絲絲八到，Preferred Banking最先會喺香港、新加坡及印度推出，之後擴展至其他國家，目標係年底時嘅新客戶數量較推出時翻一倍；其實喺過去一年，符合「進富一族」條件嘅渣打客戶有雙位數升幅，絲絲相信佢哋要達到目標應該唔難。
余絲韻