台灣首富兼鴻海董事長郭台銘已經59歲，好多人關心佢嘅接班人選，佢就大派定心丸，話喺佢個細女結婚前仍會繼續工作。郭台銘個細女「妞妞」喺去年出世，今年先至一歲，計計吓佢應該仲有20年時間工作，即係要做到80歲。絲絲覺得郭老闆依家同外界講明，好過成日被人問佢幾時退休。
早前郭台銘備受「富士康員工跳樓事件」影響，頻頻出嚟解畫，今次佢出嚟係公布公司嘅未來發展計劃，首先係公司嘅增長目標由30%降低至15%，主因係蘋果嘅iPhone及iPad需求放緩；其次佢話考慮收購生化科技公司，以進軍納米科技市場等方法刺激公司增長。
雖然郭台銘話喺細女「妞妞」長大嫁人前，佢會繼續工作，不過佢會喺3年內公布接班布局。絲絲知道台灣有唔少富豪七十幾歲都未退休，唔知係唔係台灣嘅特色呢？
余絲韻