相信唔少人都試過利用衞星導航（GPS）嚟搵路，原來證券界都有人用衞星圖片做業務分析，仲講到好科學化，似層層咁，不過絲絲覺得係噱頭大於一切。
講緊嘅係瑞銀喺美國分別向兩家私人衞星公司購買衞星圖片，用嚟數住美國最大超市之一嘅Wal-Mart個停車場每月有幾多車流量。愈多車即係表示愈多客，生意額就愈好，預測報告亦依據泊車數目而來。
預測能力有幾高？以第二季為例，傳統分析估計Wal-Mart銷售額按年跌1%，衞星圖片分析就話唔同地區嘅Wal-Mart喺六月時多咗好多車停泊，所以銷售額會升0.7%，最終佢哋第二季銷售額就按年升4%。雖然呢次衞星分析與真實結果「同向不同步」，但瑞銀話有實質數據支持，好過淨係聽分析員嘅意見，仲話會用相同方法預測其他大型超市以及麥當勞嘅盈利。
絲絲覺得「數車法」有些少本末倒置，瑞銀自己都解釋番，話六月多咗車，與當月有大減價有關。而且呢種睇衞星圖數車嘅方法，唔係個個地區都可行，起碼香港就行唔通啦。
余絲韻