每年喺港大教書，電子金融服務係筆者重點研究同教授嘅學科，亦都係連續5年成為學生喜歡報讀嘅科目之一，講真，唔講金融，香港仲有咩嘢講！
一開始就會同班碩士生講，金融市場已經進入咗一個單一市場，以前金融機構各自為政，依家因為「世界在變，我們也在變」，所以銀行大笨象做保險做到一哥，都咪話唔犀利，但喺香港，好少見到保險公司走去做銀行、證券業務，可能有好多原因喺後面啦！不過，平保（02318）又一次「突破常規，創造傳奇」。
停牌兩個月嘅平保終於公布旗下平安銀行同深圳發展銀行嘅整合藍圖，同市場預期差唔多，平安銀行將以約1.9倍市帳率（PB）注入深發展，深發展將向平保配發16.39億股新股，令平保持有深發展由目前29.99%一下暴增到52.39%。交易總對價為291億元人民幣，依家交易仲要等雙方「家長」同監管部門嘅批准同祝福。
平保咁做嘅目的都係想加快提升自身嘅銀行業務，買入後整合，成為一個最快嘅原動力。平保上半年業績表現強勁，且其他業務，包括壽險、財產險、銀行都表現良好，如果金融整合係一個形勢，咁嗰班離棄國壽（02628）但依舊搵緊投資中國保險股嘅投資者又可能進一步加強平保上升嘅激發點。
香港大學電子金融服務榮譽助理教授 徐燦傑