絲絲講場：物價飆漲新詞——「不蛋定」
呢排內地同胞好似成日都要捱貴餸，事關繼大蒜漲價被人叫做「蒜你狠」（算你狠）、紅豆綠豆黑豆漲價被人話「豆你玩」（逗你玩）、價格連升三十幾日嘅薑叫做「薑你軍」（將你軍）之後，呢排雞蛋價格又係咁升，有時仲日日唔同價添，於是內地人就叫呢個現象做「不蛋定」，即係話雞蛋價錢唔夠「淡定」喎。
內地蛋時價唔「淡定」
事關自六月以嚟，全國各地都陸續出現雞蛋「一日一價」嘅報道，令到好多師奶主婦都好頭痛，明明尋日仲賣緊六個二人仔，轉個頭今日就無喇喇加到八個二，點解會咁呢？絲絲聽內地老友講，今次雞蛋價格係咁升，與大蒜、薑價上升嘅原因唔同，主要係因為粟米等嘅飼料價格猛漲，令蛋價以及養殖成本倒掛，養殖戶減少雞蛋供應所致，喺冇理由做蝕本生意嘅情況之下，啲蛋咪係咁加價囉。
其實蛋價升得咁快，老友話啲賣蛋嘅銷售商都好慘，事關無論升價幾多，佢哋賺嘅錢都梗咗係兩毫子人仔，其他統統要畀番供應商，但係師奶主婦就嫌啲蛋貴得滯，唔買咁多，令銷售商成日都有賣剩嘅蛋，而蛋係有保鮮期，唔似得薑同大蒜咁擺耐啲都得，加上運費等其他成本，其實唔單只市民，連銷售商都喺度嗌救命，希望啲蛋價可以快啲「淡定」番喎。
余絲韻