絲絲講場:內地統計局唔敢亂噏

喺十幾廿年前,內地公布嘅數據好少,信唔信得過都要用。依家經濟數據多咗好多,民眾嘅水平亦大幅提高,佢哋對於唔可靠嘅數字會發炮狂轟,搞到統計局局長馬建堂喺早幾個月,日日要上網幾次去「體察民怨」添。

馬建堂日前喺研討班透露,統計局下一步要對六方面做改革,包括樓價、收入、失業率、住宅空置、中央及地方GDP嘅統計等。大家要留意,呢啲全部都係成日畀外界「詐型」話統計唔準嘅項目嚟嘅。

樓價統計盡快改革

馬局長美其言話,「公眾嘅關注及壓力,係統計局不斷改進嘅強大動力」。佢就以今年初公布去年70大中城市樓價上漲1.5%呢件事嚟做警惕,嗰次民情激憤,鬧爆統計局嘅數據「灌水」,佢哋從未試過咁大壓力,馬建堂仲日日要上網3、4次,仔細瀏覽公眾嘅「意見」。

佢都知道大家關注樓價,講明最快喺明年實施新嘅統計方案,又話會研究建立空置住房嘅調查辦法,總之大家唔滿意嘅,統計局今次都有做嘢。

余絲韻

Money18新功能「18好路數」為你預測心水股票升跌機會率