絲絲講場：電視廣告Sell月餅 稻香旨在攻內地
臨近中秋節，唔少推出月餅嘅餅家大賣廣告宣傳，稻香（00573）雖然唔係首次賣月餅，不過今年佢哋都大灑金錢，用咗800萬元做宣傳，亦係佢哋首次喺電視賣廣告。稻香行政總裁梁耀進話，今次賣廣告係為咗打響品牌，賺唔賺到錢係其次，最終目標係進軍內地嘅月餅市場。
內地銷售增長跑贏
近年愈嚟愈多食肆推出月餅，香港嘅月餅市場競爭激烈，絲絲問梁耀進做月餅係咪好賺錢，佢笑笑口話，其實各大食肆做月餅嘅利潤大致相若，冇話邊間好賺啲，不過今次大賣電視廣告為咗品牌，希望多啲內地人認識佢哋。
稻香上半年嘅盈利增長0.7%，上半年本港收入跌咗0.1%，反而內地收入就大增11.1%，同店銷售增長1.5%，梁耀進話下半年內地嘅同店銷售增長與上半年相若，本港同店銷售增長可能難有起色；佢又話上半年食材價格升咗8%，下半年升幅會差唔多，希望明年第一季投產嘅食品物流中心可以抵銷部分成本上升。
余絲韻