絲絲講場：李寧腰痛棟篤企解畫
「體操王子」李寧好耐都冇代表公司李寧（02331）出嚟見人，佢尋日特登由北京飛嚟香港與投資者及傳媒見面，親自為快意節能（08032）單「刁」解畫，不過講講吓嘢，「體操王子」突然講咗聲「唔好意思」，然後企起身郁吓條腰，原來佢話自己去年做咗腰部手術，條腰唔多舒服，所以索性企喺度講嘢。
「體操王子」大玩財技，公布將自己持有嘅李寧「唧」入快意節能，一連串動作令市場人士好費解，令到李寧嘅股價呢幾日係咁跌。已經淡出管理層嘅李寧尋日親自現身與大家當面溝通，解釋公司點解要咁做。
李寧非常Nice，一啲架子都冇，一坐低就話自己廣東話唔好，不如用普通話講，然後又自嘲自己嘅普通話都唔算好。不過絲絲覺得身為廣西人嘅佢，廣東話同普通話都講得好好。
快意節能炒上賀壽？
絲絲對上一次見「體操王子」係○八年北京奧運時佢做火炬手，當時年紀已經唔細嘅佢，仲做到一啲高難度動作，但原來佢有腰患，去年做咗手術，今次記者會開到一半，佢就突然企起身，話條腰唔舒服，要郁吓喎。
話時話，原來李寧喺九月八日出生，以今時今日快意節能嘅股價升勢，佢今年呢份生日禮物都應該唔嘢小。
余絲韻