有人話：商場如戰場。金融市場同戰場都係咁相近，古時打仗最重要任務梗係「留前鬥後，消滅敵人」，係每一位投資者都必須遵守同服從。記住戰爭一定會有傷亡，投資就更加唔使講，點可以以最少嘅犧牲嚟換取最大嘅勝利，就係每一位投資者要研究嘅課題喇。
中文大學嘅EMBA令我更加領略到中國智慧嘅威力，春秋戰國時期，有一位偉大的軍事家──孫子，佢以實戰經驗編寫成《孫子兵法》，到依家都咁啱使，欄位有限，講唔晒全部，喺股市上上落落，講孫子，特別有感應。
投資要懂得利用形勢，把握機會：
孫子曰：「故善戰者，立於不敗之地，而不失敵之敗也。善用兵者，修道而保法，故能為勝敗之政。」投資嘅不二法門，係指要喺學識同修養上下工夫，入市出市必須「遵守紀律」，咁樣先至可以立於不敗之地，而且唔會失去任何獲取「大利」嘅好機會。
懂得化繁為簡，才能統率大局：
孫子曰：「凡治眾如治寡，分數是也，鬥眾如鬥寡，形名是也。三軍之眾，可使必受敵而無敗者，奇正是也，兵之所加，如以般投卵，虛實是也。」
投資無論喺收集資料、制訂策略定係實際操作中，都需要建立一套「行之有效」嘅制度、紀律同埋方法，但記住執行時要可以靈活運用而又不離宗旨，唔好死板板同夾硬嚟。
在上落市中，共勉之。
香港大學電子金融服務榮譽助理教授 徐燦傑