絲絲講場：人行匯策傾唔到息向
內地嘅貨幣政策會點走？人行短期內會唔會加息或調整存款準備金率？呢啲咁敏感嘅問題，官員梗係守口如瓶，所以市場慣咗喺人行貨幣政策委員會委員身上搵靈感。做過兩年委員嘅余永定最近口快快洩漏天機，原來作為諮詢議事機構嘅貨幣政策委員會，一向都冇得參與加息討論。
余永定：只提意向
絲絲翻查內地相關條例，清楚寫明貨幣政策委員會嘅職責，包括討論貨幣政策嘅制訂及調整，以及貨幣政策工具運用等事項，並「提出」建議。人行要報請國務院批准貨幣政策重要事項嘅決定方案時，要一併上報貨幣政策委員會嘅建議書或會議紀要。
所以啲委員每次發表言論，都會成為市場焦點，大家都嘗試喺字裏行間揣摩人行嘅政策走向。不過，余永定喺訪問中就好坦白咁直接講明佢做委員嗰陣，委員會只係提出政策意向及經濟形勢分析，至於加息呢啲高度機密，佢哋同大家一樣要「事後」至知。咁睇嚟大家想知加唔加息，惟有直接去問小川同志嘞。
余絲韻