英超球隊利物浦（紅軍）要搵新水喉嘅消息一直擾擾攘攘，最新消息話有神秘海外富豪提出以4億至5億英鎊收購。剛啱至做咗利物浦最新主要贊助商嘅渣打（02888），重點喺亞洲市場搵食，佢哋即時表態話樂於見到利物浦搵到一個「同聲同氣」嘅亞洲班主咁話。
睇開英超而又心水清嘅讀者應該留意到，今年利物浦波衫心口個贊助商標誌改咗。冇錯，係轉咗港人熟識嘅渣打。據講渣打出重金8,000萬英鎊與利物浦簽咗為期4年嘅主要贊助商合約，至攞到呢個喺正心口嘅廣告位。
不過，渣打發言人勞斯話呢個價係超值，因為與直接落電視廣告比較，買英超今個球季首場利物浦對阿仙奴賽事嘅全球電視廣告時段，已經與佢哋呢張4年贊助合約一樣價錢，咁聽落又真係幾抵喎。依家渣打個標誌放正喺波衫當眼位置，一場比賽最少打90分鐘，一年有咁多場賽事，計落真係「有So」。
自從富商黃健華表態話放棄收購利物浦後，好快就傳出有其他富豪打算收購嘅消息，仲話雙方好有機會傾得掂。勞斯話渣打冇參與融資，但好歡迎有亞洲區投資者入主利物浦，佢哋樂於見到一個「同聲同氣」嘅亞洲班主喎。
余絲韻