作為一個大學榮譽助理教授，能夠同讀者分享到自己嘅所見所聞，真係人生嘅樂事。除咗日常寫稿、上電視、喺電台開咪外，近期好多上市公司都邀請我出席佢嘅業績發布會或者係睇廠，即係「與CEO對話」，傾吓佢哋嘅公司現況。上星期，就走去TCL通訊（02618）深圳總部參觀，順道同高層見面。自從較早前本地一套電視劇播出咗後，大家都鍾意叫我做「Professor Jeslie」，真搞嘢！出到街係人都咁叫，都咪話唔高興。
好多年前，曾經有一個法國品牌叫Alcatel進軍香港，其後「黯然銷魂」，原來佢哋已經畀TCL通訊一手據為己有，呢幾年，仲幫佢哋重新包裝重新上路咁話。
上佢哋嘅Showroom行咗一轉，見證電訊業「由聲到畫，由單向走向互動」嘅發展步伐，互聯網嘅出現，令手機製造商得而重生，亦都因為手機同互聯網已經係Twins，似乎TCL通訊都會因為呢個Web 2.0嘅大趨勢下乘勢而起。
一間公司成唔成功，都係不外乎以下三個永恒不變嘅策略：包括卓越嘅營運管理、客戶嘅親密度，同產品嘅創新性，呢三點，一般心水清嘅讀者同投資者都會明，TCL通訊依家以Alcatel嘅環球品牌，將佢帶入呢個國際舞台，喺低價產品上以ODM為發展中心，以質量取勝，正正係「名利雙收，左右逢源」。久違咗嘅TCL通訊又可能會為大家做到「名利雙收」，慢慢跟蹤佢啦！
香港大學電子金融服務榮譽助理教授 徐燦傑