絲絲講場：富士康請人要測心理
富士康（02038）早前因為員工自殺以及搬廠搞到滿城風雨，但似乎無損市場對佢哋嘅信心，早前公司喺鄭州大量請人，一樣排晒長龍，據講條人龍有成公里咁長。依家富士康請人唔單只睇學歷及能力，仲要應徵者完成70條心理測驗問卷，睇吓佢哋嘅心理夠唔夠健康。
70題計分非隨口問
心理測驗涉及嘅問題，包括喺嘈雜喧鬧聲中能否即刻瞓着；會否成日亂諗未來嘅事，搞到個人唔安樂；自己獨處嗰陣會否成日覺得心煩意亂；會唔會擔心人哋對自己嘅睇法等。
應徵者要認真回答問題攞分，凡符合情況嘅就加兩分，一般嘅就加一分，唔符合情況就「食蛋」。
富士康要揀心理質素好啲嘅員工，完全可以理解，如果唔係，萬一抵受唔住壓力就唔知點算。富士康冇講明份心理測驗係咪揀人嘅主要考慮因素，但點都好，以今次招聘會咁多人捧場，就知道接連嘅跳樓事件對佢哋招聘冇乜影響。
余絲韻