內地大批民營企業家早喺幾年前就開始物色接班人，但好多「富二代」一係就冇興趣，一係就缺乏做舵手嘅資質，依家愈嚟愈多民企富豪就打算將盤生意交畀個女，好似碧桂園（02007）董事長楊國強、娃哈哈集團董事長宗慶后及滙源（01886）董事長朱新禮，佢哋就好積極培養個女做接班人。
朱新禮講過好多次，話困擾佢嘅心病就係搵接班人，但佢嘅寶貝仔鍾意打小白球多過做果汁，朱新禮於是想培育女婿高勇，點知佢又淡出埋滙源，最後佢就將重任委以女兒朱聖琴。
其實朱新禮一直好重視對朱聖琴嘅培養，早喺14年前朱聖琴就加入滙源，做過市場部經理、廣告總監及投資副總裁，佢參與咗達能、華平基金嘅引進以及公司上市，仲攞咗長江商學院高級工商管理碩士學位。最近朱聖琴做埋銷售部門嘅揸Fit人，呢嗰位係滙源嘅關鍵崗位，所以被視為接班嘅重要標誌，睇嚟朱新禮嘅心病好快會好番。
余絲韻