絲絲講場：大前研一成功秘訣 Plan定一年行程
人稱「世界趨勢大師」嘅大前研一，經常會發表對市場有舉足輕重嘅言論，好多國家領導人都向佢取經。佢喺上個禮拜匆匆來港，仲透露咗佢成功嘅秘訣，幾值得大家參考吓。
有紀律生活40年
大前研一每朝早5點鐘就會起床，每日睇500段新聞，追求最Update嘅資訊；佢話每日嘅工作行程都喺一年前就排定，唔單止到世界各地嘅演說及顧問工作早就安排好，連滑雪、釣魚及吹單簧管都喺一年前預早計劃。「40年嘅生活如是，咁樣可以令自己專注工作」。
時刻都保持有紀律嘅生活，正係大師嘅成功之道，不過如果記者約佢做個人專訪，唔通都要一年前預約？
67歲嘅大前研一毫無架子，經常臉帶笑容，記者做完訪門佢都不斷講多謝，期間有攝記唔覺意跌親，佢大為緊張，仲流露關心之情。查實大師仲好有童心，佢嚟香港前喺重慶「美甲」，兩隻手指公都印咗「中國國旗」及「熊貓」圖案，佢同絲絲講，冇乜重要意思，純粹「For fun（貪得意）」。
余絲韻