絲絲講場：星展葉約德年底退休
絲絲收到消息，星展嚟緊有一番人事變動，星展香港行政總裁葉約德（Amy）即將喺年尾退休，而接佢棒嘅係資深銀行家龐華毅；另外，又新設星展新加坡國家經理一職，由花旗銀行香港前主席林森成擔任。
退休後挑戰係「冇計劃」
Amy喺嚟緊十月就會開始放大假，問到退休後有乜搞作，佢就話退休後有個好大嘅挑戰——就係「冇計劃」。咁又係嘅，Amy出晒名勤力，工作時間表經常排到密麻麻，突然間要適應悠閒嘅退休生活，的確會唔慣。唔講你唔知，Amy自16歲開始做嘢，除咗做過人人都知嘅金管局及銀行業外，佢仲做過補習、賣衫Sales以至餐廳，讀書時嘅Part-time更可謂一份接一份。咪以為掛住做Part-time會影響學業，Amy就同絲絲講，話佢喺美國讀大學時，年年都攞獎學金㗎。
林森成出任「國家經理」
至於接棒嘅龐華毅，絲絲就八到佢係厄瓜多爾公民，已經喺銀行界做咗25年，喺非洲及印尼交出唔少好成績，仲做過花旗集團嘅南非行政總裁，等監管機構批准後，佢會喺九月中正式上任。
喺九月初出任星展新加坡國家經理嘅林森成（Sim S.Lim），之前係花旗集團日本環球市場主席，喺○七至○八年亦做過花旗銀行香港主席。絲絲知道林森成本身係新加坡公民，今次可謂返家鄉大展拳腳，更可以多啲時間陪家人。
余絲韻