絲絲講場：英股舵手加薪紀勤第3
絲絲尋日話高盛、花旗及摩通嘅掌舵人成為美企「減薪之王」頭三位，那邊廂就有上市公司舵手狂加薪，據英國《獨立報》報道，部分富時100指數嘅上市公司掌舵人薪酬勁漲，最厲害係蘇格蘭皇家銀行（RBS）行政總裁赫斯特，人工加幅達6.4倍；今年滙控（00005）成績理想，行政總裁紀勤人工加幅亦有兩倍。
蘇皇CEO加薪6.4倍
金融海嘯後，投資者對上市公司高層加薪態度較為敏感，特別係華爾街投行高層，所以有唔少高層自動減薪。今年經濟回暖，有上市公司高層就狂加人工，加幅最多係赫斯特，去年人工只有16.4萬英鎊，今年佢冇花紅，淨係人工就加咗6.4倍，有成122萬英鎊。人工加幅最多嘅第二位係力拓行政總裁艾博年，去年收211萬美元，今年連人工及花紅就有903萬美元，加幅達3.2倍。
去年紀勤收咗167萬英鎊，不過有見公司業績唔理想，雖然冇自動減人工，但就將花紅捐畀慈善機構；佢今年嘅收入就有568萬英鎊，多過去年兩倍。《獨立報》話，即使經濟環境轉好，上市公司股東仍反對高層加人工，因為擔心經濟再衰退，影響公司業績，當中馬莎有兩成股東反對給予前首席執行官1,500萬英鎊薪酬。
余絲韻