市場熱線：百麗長揸短炒

祖國魚缸昨日回穩，以為本地魚缸短暫調整告一段落，恒指跟國指略為高開。祖國七月份經濟數據合乎預期，七月份CPI同比升3.3%，即係短期無必要請「息魔」出動，同時反映周一祖國魚缸大幅下滑，係缸邊友「過敏症」發作，深滬魚缸回穩，恒指一度隨祖國魚缸上升而回升至21,600點水平之上。

下半場走勢卻急轉直下，恒指低見21,239點，相當接近上周一的上升裂口21,221點。散場收報21,294點，跌179點；國指跌206點，收報11,737點；現貨場成交額回升至613億元，意味回吐沽壓有所增加。

恒指仍有調整空間

照目前情況睇，恒指可能要完全回補上周一的上升裂口，即21,000點水平，不過大方向仍然係向上。其實本地魚缸由上月二萬點邊回升，至周一高位21,800點水平，累計升幅達1,800點，以黃金比率0.382回吐幅度計算，恒指見21,113點的機會極高。

大隻佬升少跌多，和黃（00013）表現最標青，除咗交出一份見得人成績表外，霍大班增持刺激股價更上一層樓，破52周高位見63.1元，係22個月新高，收報61.85元，升6%係眾大隻佬升幅之冠。

QQ（00700）散場後派成績表，但股價卻先插水4%，收報148.7元，大隻佬中跑第尾。QQ份成績表又唔係太差，半年賺37億元人仔，增長66%，係預期上限，估計今日股價有得彈一彈。

港交所（00388）份成績表無驚喜，上半年純利僅增3%至22.58億元，係預期下限，兼且連斷估專家預測盈利的一半唔夠，拖累股價跌2%，報129.1元，公仔圖表走晒樣。

百麗國際（01880）今個月廿四日派成績表，預期銷售增長20%，盈利則有38%增長。集團持續優化營運效益，以及受惠於Nike計劃以低價產品大舉進入四至五線城市，運動服業務會係新增長亮點。

充分發揮規模效益

百麗係祖國女裝鞋零售龍頭，隨着祖國生活水平提高，消費能力增加，集團在受惠於規模效益的優勢下，通過垂直整合，市場佔有率進一步提升。基於集團的鞋類業務同店銷售增長高於預期，以及運動服同店銷售改善，預期今年業績可繼續報佳音。雖然百麗已升超○七年高位再創新高，但在理想業績公布前，股價仍有一定上升動力。

戰報

中國海澱（00256）+7%

帥哥周一推介的中國海澱，昨日逆市呈強，並一度高見1.02元，較推介當日低位0.95元升7.3%。

保利協鑫（03800）+7%

高仁昨日推介的保利協鑫，股價逆市呈強，最高升上1.95元，以低位1.82元計，單日升幅超過7%。

古勝