本地銀行推出聯營卡就司空見慣，絲絲近排見內地銀行亦諗盡法寶推出聯營卡。建行就出咗一張與南華寺合作嘅「六祖祈福卡」，唔單只有一般銀行卡嘅功用，仲可能好有「靈性」添。
唔少傳統中國人都會將長輩或自己求番嚟嘅平安符放喺身，今次建行呢張卡真係好突破，新創「一卡兩用」嘅新模式，據建行介紹話，「六祖祈福卡」經過廣東韶關南華寺住持，喺第二屆禪宗文化節主持開光儀式，仲由三百名高僧歷時近三粒鐘幫佢頌經祈福。
「六祖祈福卡」係內地第一張有歷史人物紀念意義嘅借記卡，設計上印埋禪宗六祖慧能個像，背景就係六祖最出名嘅佛偈「菩提本無樹，明鏡亦非臺。本來無一物，何處惹麈埃。」
內地網民對呢張卡都好多意見，有人直情用「史上最牛銀行卡」嚟形容佢，亦有人話佢係最有靈性嘅銀行卡。不過用呢張卡做善事始終方便啲，因為卡主可用埋每年自動轉帳向南華寺捐獻，係名副其實嘅一站式慈善理財服務。
余絲韻