絲絲講場：花旗搵「陳七」Sell卡
睇準今年本地消費市道暢旺，銀行界都絞盡腦汁力谷信用卡業務，但好多香港人閒閒地手上都至少有幾張信用卡，銀行點樣先至可以吸引多啲客戶「碌卡」？除咗推出唔同嘅信用卡簽帳優惠外，仲可能要出動名人效應呢招撒手鐧，好似花旗早前就請嚟香港足球先生、綽號「陳七」嘅陳肇麒，與佢哋嘅環球個人銀行服務信用卡業務總監郭偉略齊齊幫手做宣傳。
商場活動切磋球技
花旗信用卡早前安排咗100名客戶與佢哋嘅親友，參加喺商場舉辦嘅活動，等佢哋有機會與「陳七」近距離接觸。活動上當然唔少得「陳七」Show吓佢精湛嘅腳法啦，而郭偉略亦趁住呢個機會與「陳七」切磋球技。
絲絲知道，好多「賓卡」除咗鍾意打高爾夫球，亦都好鍾意踢波。見到郭偉略嘅控球技術純熟，就知佢係好波一族。當日「陳七」送咗件南華球衣畀郭偉略，佢咁識做，唔知花旗會唔會即刻出番張信用卡畀佢，乘機吸納多一位名人客戶呢？
余絲韻