渣打集團（02888）前主席、英國前貿易與投資部長戴維思（圖）冇做銀行家後，唔單只成身無晒銅臭味，公開演講用詞都尖銳咗，開始有政治家風範。全世界都鬧銀行家淨係識保住花紅、獎金，戴維思都睇唔過眼，好直接咁話曾為咗呢啲銀行文化覺得好蒙羞，尋日佢就喺上海高呼銀行界要減薪。
佢尋日喺上海金融論壇對住幾百位與會者，猛烈批評銀行家，佢話好多金融機構將四至五成嘅盈利畀咗班高層，咁高薪有乜可能年年維持到？佢仲鬧班銀行家喺金融海嘯後嘅半年，依然淨係關心份人工及花紅有冇影響，而唔係一齊諗計搞掂個爛攤子，作為銀行家嘅佢話當時好羞恥，佢仲驚現場與會者聽唔明，再重複講「羞恥」呢個字。
余絲韻