內地尋日驚傳中金嘅首席經濟學家哈繼銘即將辭職，加入高盛投資銀行部，仲話佢最快喺十月中旬履新。雖然中金及高盛都唔肯發表評論，但呢位投行界紅人蟬過別枝嘅消息，即時引起各界高度關注。
話時話，哈繼銘走嘅路就與高盛前高級中國經濟學家梁紅啱啱相反。梁紅喺○八年離開高盛，之後就入咗中金投資銀行部。
哈繼銘嘅經歷及履歷唔嘢小，佢喺八七年攞到復旦大學管理學碩士學位，九三年做埋美國堪薩斯大學經濟學博士，曾任國際貨幣基金組織經濟師、駐印尼代表，亦喺香港金管局經濟研究部做高級經理，至○四年四月加入中金。熟悉哈繼銘嘅人都知，佢講嘢慢條斯理，同人拗實蝕底；但佢話發表觀點時，唔需要做侵略性姿態，因為「我嘅研究係言之有據嘅」。哈繼銘喺內地有無數「粉絲」，佢提出嘅「人口結構主宰房價」、「中國人會未老先富」、「中國給最富裕國家提供經濟補貼」等見解，條條轟動，聽講人行都曾打過佢主意呢！
余絲韻