莫非真係「一山不能藏二虎」？陳南祿剛於上周四正式上任恒隆地產（00101）及恒隆集團（00010）董事總經理（MD）職位，尋日公司就宣布執行董事吳士元（Terry）將辭去其職務，由尋日起生效，不過通告就講明Terry辭職係因其決定從事私人事宜，與董事局冇任何分歧，大家千祈唔好亂諗呀！
對於「愛將」離開，恒隆地產董事長陳啟宗（Ronnie）尋日亦罕有地親自回覆絲絲，話Terry加入恒隆近10年，當然有貢獻，不過人各有志。
市場揣測Terry嘅離開是否因為「一山不能藏二虎」，皆因恒隆搵咗陳南祿接替袁偉良做MD，Terry間接冇咗升職機會，且Terry與陳南祿都與傳媒關係甚佳，陳南祿上任後，Terry或無用武之地。向來妙語連珠嘅Ronnie笑言：「我哋唔係藝人，做歌星先至要見多啲傳媒，我哋只係做生意啫。」再者兩人職務不同，陳南祿係MD，乜嘢都要睇，而Terry主要負責租務。雖然Terry走咗，但佢哋嘅租務部都有好多經驗豐富嘅同事，所以暫時冇計劃請人頂Terry個位。
絲絲對Terry辭職不感意外，喺四月底時，佢上司兼「老友」袁偉良擬退休，公司委任陳南祿頂替其MD職務後，絲絲曾嘗試打電話畀Terry，睇吓佢有乜打算，因為當年係袁偉良一手引薦佢入恒隆，惟當時發現Terry已改咗手機號碼，及至佢行使恒隆認股權及悉售有關股份賺逾1億元，更確認絲絲嘅想法。
Terry入咗恒隆9年，正所謂「人生有幾多個10年」？加上佢又曾做過腦腫瘤手術，或者係時候放下工作享受人生。
余絲韻