有時候，基本因素對短線炒家幫助不大，反而純睇圖炒得仲過癮。當然，無論係睇基本因素或睇圖都各有好處，但最慘係此兩大「幫派」互相矛盾之時，就會有「精神分裂」的狀況出現。至此，筆者建議大家先睇圖，後睇基本因素。何解？事關匯市變化太快，若純睇基本因素去短炒，相信只會不斷中止蝕。
既然講開圖表走勢，今日就先講講各貨幣走勢。先講美匯指數，五月初突破從今年二月中至當時的橫行區頂部阻力（約82.3水平）後，上升動力持續至今年六月七日高見88.708，其後就「穩定地」下跌至昨日的82.73。大家可能已經發現，現時美匯指數與早前突破的阻力相差不遠吧？對！故大家又睇睇兩隻歐幣幅圖，是否有一些「高處不勝寒」之感呢？
仔細地看，英鎊上周在1.55水平轉向時，與四月中的1.55高位首尾呼應，短線要上破該位實在不易；反之，英鎊短期若失守從六月初至今的上升軌支持，下調壓力非淺。策略上，短線仍是逢高沽鎊，短線目標睇1.5130，中線見50日線（昨日為1.48）亦不奇怪，升穿買入價100點子止蝕。
歐元方面，就明顯比英鎊強，在五月初至今營造圓底上升形態，圓底頸線約在1.313左右，能否一步到位？天曉得，現時策略仍以候破頸線後買入最實際，中線目標1.36，跌穿1.2950止蝕。
阿Lam