市場熱線：美聯水漲船高

孖屐憧憬「伯哥」有利好魚缸說話發表，歐美魚缸都有老利表現。昨日祖國魚缸似要抖氣，本地魚缸則隨ADR高開，恒指重上20日線，國指亦高開96點。祖國魚缸強勢再現，在周初已見放量上升，不過滬綜指在2,500點水平見獲利沽壓，皆因呢個係重蟹區。

最好係炒股唔炒市

本地魚缸曾因為祖國魚缸見攰收窄升幅，但歐洲魚缸開波做好，好友得到支持，恒指衝高收報20,487點，再升222點；國企指數則升182點，收報11,689點，跑贏大市。現貨場成交額551億元，雖然有淡友認為成交未能配合升勢，但古勝則認為成交奀，大戶才容易操控上落，都係嗰句，本地魚缸暫時未見確實方向，都係上落市，如此情況最難捉，炒股唔炒市穩陣。

藍色大隻佬普遍箭嘴向上，「鄉下佬」（00017）、中鋁（02600）跟招商局（00144）分別為升幅冠亞季軍，股價均升逾3%。「油魔」有番精神，帶動其他商品上揚，中海油（00883）跟神華（01088）分別升2.3%及2.6%。出口股表現麻麻，利豐（00494）跌1.8%跑第尾，收報35.1元，富士康（02038）又有員工墮樓，股價跌0.8%，收報4.98元。

本地錢莊的人仔業務，已拓展至服務業，日後還可以進行同業拆借，以及發行以人仔計價的投資產品，本地錢莊多條財路，股份有追捧。紅色錢莊則回升，除民生銀行（01988）打個平手之外，其餘錄得0.3%至2.5%升幅。新丁農行（01288）微升0.3%，守住招股價，收報3.22元。

雖然北大人再次重申，打壓屋仔市場唔會手軟，但紅色地主升勢未受阻，對相關利淡言論免疫，繼續有買盤追捧。至於祖國有意整合超過800間的鋼鐵企業，打造200家有規模的鋼企，在本地魚缸上市的紅色鋼鐵股，全部屬於重量級，晒士有番咁上下，當然能受惠是次行業整合，有助透過購併，擴大規模。

下周官府又有傳統豪宅位置的靚地賣，估計呢塊地一定爭崩頭，皆因山頂地皮買少見少，拍賣結果或可將豪宅價格再推向另一高峰。睇番上次拍賣何文田地皮後，屋仔市場價量均見回升，投資氣氛回暖，最好搵當然係地產代理。

樓市暢旺可保佳績

美聯集團（01200）為香江的龍頭物業代理之一，近日單係賣新盤都賺到笑呵呵。除咗住宅之外，美聯旗下的附屬公司美聯工商舖（00459），從事工商、商業及商舖之代理業務，今年同樣好環境。皆因唔少表叔搞投資移民，除咗買豪宅外，亦有投資工貿物業，在下唔少祖國老友，開始轉買廠廈同商舖，因為相對收租更好yield。官府之前推出「9招12式」，但未阻礙屋仔市場交投兼價格保持暢旺，相信今年物業買賣數量會穩步增加，美聯賺佣亦水漲船高，今年一定交出一份靚仔成績表。以其現價往績市盈率只有7.4倍計算，現價估值唔算高，10倍市盈率計，股價有條件見9.5元。

戰報

聯想集團（00992）+9%

股博士本月十五日推介的聯想集團，昨日一度升過上4.94元高位，較推介當日低位4.52元升逾9%。

中國鋁業（02600）+9%

帥哥周一指中鋁值得憧憬，當日低位5.92元，昨日一度升上6.47元高位，累積升幅9.2%。

古勝