幾年前，路勁基建（01098）公布用接近13億元收購順馳55%股權，大家都覺得係執到寶，話晒順馳當時有近700萬平方米嘅土地儲備，對於有意進軍內地房地產嘅路勁嚟講，不失為一條「捷徑」。殊不知路勁主席單偉豹近排喺內地一個晚宴上忍不住向傳媒大吐苦水，話當年估唔到順馳個「窿」有咁大，呢單收購其實蝕底咗，直到去年先至開始真正賺到錢。
內地嘅《每日經濟新聞》引述單偉豹話，當年收購前前後後只用咗個幾月時間，有好多嘢都做得唔周全，直至收購完成後，喺○六年底先發現「窟窿」遠比想像中大。樓價到○七年開始升上去，一班管理層開心咗冇幾耐，○八年樓價又再跌過，一路捱到去年，路勁地產先開始真正賺到錢。
雖然呢次經驗教識咗單偉豹，以後收購新項目時要花多啲時間調查吓先，不過佢始終都睇好內房業，覺得最少仲可維持20年嘅發展，仲話路勁自接觸咗房地產後，對公路業務嘅興趣就冇過去咁濃厚，以後仲打算再加大房地產業務嘅投資，增加10%至15%嘅成本建設低碳住宅。
余絲韻