絲絲講場：交銀新卡結合積金保險
香港人供強積金都供咗好多年，嚟緊仲會開埋「半自由行」，絲絲見到好多財富管理及金融機構都為呢件事磨拳擦掌，準備大展拳腳。交銀香港有先見之明，尋日已推出強積金嘅新產品，就係全港首張集合強積金及保險優惠嘅信用卡。
迎明年「半自由行」
呢張信用卡用咗MPF及Insurance兩個字嘅開頭命名，叫「ＭＩ」信用卡，交銀香港副總經理陳霞芳話可以用「ＭＩ」卡管理財富。夥拍出卡嘅機構係同系嘅交銀信託，交銀信託行政總裁李紹基話，今次呢張卡可以強化佢哋嘅強積金服務，仲表明好期待明年嘅「半自由行」。今次交銀呢張新卡設計好有內涵，卡面有沙漏圖案，沙代表財富，喺沙漏入面慢慢累積，最後聚沙成金。
交銀香港趁早推出呢種財富管理信用卡，與母行交行（03328）一樣咁有先見之明，皆因交行係內地五大商業銀行最早集資，依家搞掂晒，唔使同四大行爭崩頭。
余絲韻