呢排全個北半球都好熱，心靜都未必會涼，係時候令大家工作之餘涼快一啲。恒生銀行（00011）由本周開始，逢周五喺許可嘅範圍內容許員工穿着便服（Smart casual）上班，據聞呢項德政係為咗響應環保，而且仲係員工提出嘅要求添。
乜嘢為之許可範圍？即係「非穿着制服及無需見客同事」，咁又啱嘅，如果分行嘅職員都穿便服，客戶好易搞錯。不過依家時裝款式好有個性，你認為趕上潮流，但喺其他人眼中就可能太過火，分分鐘好似「冇王管」。為咗令大家清晰啲，恒生對便服係有定義嘅，講到明唔可以着牛仔衫褲、運動衫褲、單件背心、三個骨褲、短褲、迷你裙、波鞋、屐、拖鞋及拖鞋款涼鞋。雖然呢啲衣物唔可以着返工，但絲絲覺得女員工仲有好多選擇，而男員工當日與平時最大分別就係唔使打呔。至於要見客嘅非穿着制服同事，就仍須穿上商務服飾上班。
除咗呢項德政之外，恒生近日見到紅十字會話血庫嘅血「入不敷支」，要大家多多捐血，上周就有一項「募捐」，超過120個員工短短兩日已捐咗50公升嘅血畀紅十字會。捐血近70次嘅樓宇貸款授信部職員鄭國光向絲絲介紹捐血好處，話捐血除咗可以救人，亦可促進新陳代謝，令身體更健康。來自基金投資服務部嘅新進捐血善心人葉曉暉就係第一次捐血，話恒生安排捐血日幫佢行出咗第一步喎。
余絲韻