期指觀瀾：市底不強只炒即市
外圍好轉多時，加上A股氣氛改善，昨日港股終有個似樣反彈，衰就衰在同前日一樣，一到下午港股又走晒樣，滬綜指收市前升幅不斷擴大，港股升幅卻不斷收窄。說穿了，一個市底唔強的升市，即市炒家都擔心隔晚美股變化，唔想揸重貨過夜。
恒指昨日升173點報20,264點，同高位20,403點比較低139點，值得留意，是七月期指曾經轉為高水，可惜又係一瞬即逝。唯一安慰，是收市計恒指僅高於10日線20,260點，日線圖走勢未至於太差。
雖然尋日走勢有點令筆者失望，但按建議操作卻大獲全勝，早市20,100點附近建好倉，即日已升抵20,370點首個目標，更只差十多點連20,450點本周目標也抵達。美股如果變動唔大，今日在20,150至20,200點之間又再有買入機會，但基於走勢上港股已去到關鍵時刻（敏感三角形走了接近一個月有機會短期突破），筆者維持只作即市好倉，且戰且走策略，今日目標同樣是20,450點，穿20,160點止蝕。
John Mullen