市場熱線：國泰君安起錨

外圍魚缸無乜特別，惟祖國魚缸昨日放量上升，帶動本地魚缸做好。本地魚缸為追隨祖國魚缸升勢，缸湖傳聞北大人重提開放「直通車」，古勝認為吹水居多，即係市升要有理由，市跌要有解釋。恒指一度高見20,403點，可惜下半場無以為繼，即使祖國魚缸午後升幅擴大至2%以上，本地魚缸反拾級向下，可見好友信心一般，淡友未致冇命。

恒指收報20,264點，升173點；國企升196點，收報11,507點。現貨場成交額略增至518億元，在環球魚缸仍未有明確方向前，資金仍審慎。

成交靜大戶易舞弄

古勝認為近日入場炒市，等同過大海賭大細，日升日跌，完全無路捉。期貨場班大戶利用成交薄弱呢個因素，輕易將指數舞高弄低，單在千點內炒波幅上落，足夠搵飯食。好似上周四下半場，期指失驚無神在兩分鐘內急插200點，八卦公話「大魔頭」沽出2,500張「孖屐」淡倉，期指即時被質散。

昨日上半場，期貨場又案件重演，在兩分鐘內挾高200點，皆因有2,000張「孖屐」好倉柯打，在下唔排除係「大魔頭」上周開咗倉的冚倉盤，可見大戶都係玩緊短跑，以其晒士捉一千幾百點波幅已交功課，唔使吓吓賺夠三四千點先收手。

散戶睇技術指標入場玩，等於搵自己笨。如此情況，當然係炒股唔炒市，況且近日開始見番鑊氣，大大小小股份有熱身，只要魚缸仍二萬至二萬一間運行唔死得，炒股肯定着數過炒市。

藍色大隻佬幾乎全線向上，中鋁（02600）一洗頹氣，昨日升3.6%跑第一，股價收報6.24元，反彈阻力在6.32元，神華（01088）亦彈2.6%至28.9元。祖國魚缸主要由紅色地主帶動回升，缸邊友憧憬北大人放鬆調控，一直被重點打壓的紅色地主，終可逃出生天。

內房龍頭中國海外（00688）跟華潤置地（01109）昨日升勢持續，股價分別升2.3%及3.4%，其他紅色地主普遍做好。大笨象（00005）靠穩，升0.3%，收報74.2元跑輸魚缸；另一巨無霸祖國移動（00941）則升0.19%，收報77.3元，但較高位78.45元回落，升幅收窄。

短線有望重返水面

雖然「直通車」純係吹水，但祖國確有落實個人版QFII，祖國金融機構為取得網絡，唔少證券公司均成為收購目標。一眾證券股落鑊，本月八日登陸的新丁國泰君安（01788）有望重返水面，脫離潛水新丁行列。國泰君安IPO錄得超過50倍的爆燈紀錄，照計走勢唔應該咁曳，以4.3元招股，屬於招股範圍的中下限價。

由於國泰君安登場之時，祖國魚缸仍未確認轉勢，但從上周祖國魚缸的表現睇，加埋昨日開始放量上升，祖國魚缸相信已成功尋底，並回復升勢。只要祖國魚缸回復暢旺，本地魚缸重現生氣，國泰君安24倍市盈率招股價唔算貴，以其阿媽在祖國的規模及網絡，國泰君安接手個人版QFII生意，肯定唔憂做。

戰報

中海石油化學（03983） +10%

本月十四日古勝推介的中海化，昨日以全日高位5元收市，較推介當日低位4.56元升近一成。

威勝集團（03393） +7%

上周五帥哥叫候低吸納威勝，當日低位5.08元，昨日最高升上5.43元，累積升幅接近7%。

古勝