港股市況近期都跟住外圍反覆回軟，投資者紛紛為資金搵位「泊碼頭」，除咗傳統上用作避險嘅公用股，中資基建股亦得到唔少保守型投資者嘅注視。
無他嘅，因為呢類股份嘅營業額一早就喺幾年前得以肯定，亦因為阿爺最近重申咗對西部大開發嘅雄心壯志，將錢向西部傾斜，亦要令到當地經濟發展可以得到顯著改善。
講開又講，人生有幾多個十年，「西部大開發」呢個計劃真係10年前就已經啟動，但由於種種原因，以至呢個計劃未能夠取得全面成功，甚至可能會畀人一種「雷聲大，雨點小」嘅感覺。因為前車可鑑，阿爺今期「落重藥」，明顯比上一次嚟得實在，重點話強化西部地區綜合交通網絡、訊息基礎設施和水利基礎設施嘅建設。
喺「西部大開發」呢個大前提之下，於香港上市嘅基建股──中國中鐵（00390）、中鐵建（01186）及中交建（01800）近來都升咗唔少。事實上，呢三隻基建股喺○七至○八年時市盈率一度飆升至30多倍以上，但由於佢哋盈利增長理想，加上股份價格比當年為低，不妨留意。
香港大學電子金融服務榮譽助理教授 徐燦傑