承接上周美股跌勢，港股昨日低開，但未失守二萬關，市底算係強。二三線股仔個別發展，詩詩尋日吼東岳（00189），股價重返10日及50日線之下，都係睇多兩日，今日吼恒芯中國（08046）。
咪睇小恒芯呢隻創板股，其實集三網合一、物聯網、3G、軍工、醫療、手機支付及家電下鄉等概念於一身，預期一○及一一年每股盈利達0.15至0.18元，難怪有條件申請轉主板。以一○年預測市盈率10倍計，股價可見1.5元。
大家可能奇怪，恒芯既然咁抵買，點解股價未能重返年內高位？由於集團尚有2.64億元可換股票據未行使，行使價更低至每股0.34元，一旦行使，會產生攤薄效應。詩詩一於少理，只要CB未行使，仲有權短炒，先睇0.88元50日線為首個目標，升穿又企穩，下一站1元，穿0.7元止蝕。
詩詩