絲絲講場:唐駿玩低調返鄉下

中國IT界「打工皇帝」唐駿嘅學歷被質疑造假,呢件事依家仲熱烘烘,唐駿已經冇就事件講嘢,反而佢最近低調返咗鄉下常州現身同學會,仲透露準備咗兩份大禮畀老家。

勵志片個人寫照?

呢兩份大禮,包括一間即將喺納斯達克上市嘅網絡公司會落戶當地,以及一齣名為《你行我素》、類似自傳式嘅勵志電影。唐駿話呢齣電影主要講一個普通學生如何通過自己嘅努力,最終獲得「一點點」嘅成就,至於呢個普通學生係邊個,佢就點都唔肯講。佢早前亦話過,呢齣電影講述一個農村孩子到北京,從一個臨時工做到某外企嘅中國區總裁,最後成為一名億萬富豪,究竟有幾多內容係唐駿嘅寫照,絲絲都好想知。

唐駿嘅「學歷門」事件,好多公關顧問都話係好好嘅教材。公關界對唐駿事件嘅過程相當熱心,仲同絲絲慨嘆,話件事仲未正式畫上句號,可以歸納出四個危機處理嘅失誤,好似錯失咗48小時「黃金時間」以及與「粉絲」讀者誠懇溝通等。

余絲韻