雖然蘋果公司近期因為iPhone 4嘅接收問題，搞到滿城風雨，仲畀唔少行家乘機「踩多腳」，不過佢哋嘅成功始終有好多地方值得人參考。暫且唔講iPhone 4，之前佢哋推出嘅平板電腦iPad就非常受歡迎，除咗成為近期唔少潮人出街必備之物，更大大影響手提電腦嘅產業鏈，業界預期平板電腦將成為未來大趨勢。作為祖國嘅電腦一哥，聯想集團（00992）一早就睇到呢條水，早已設計咗一款自有品牌嘅獨家電腦。
近日內地媒體報道話，聯想呢款平板電腦將喺年底推出，連個名都諗埋，仲同之前推出嘅智能手機「樂Phone」互相呼應添。相信大家都估到喇，冇錯，之唔係「樂Pad」囉！
內地人可能未必覺得「樂Pad」呢個名有乜問題，講普通話好普通嘅香港人，分分鐘會將「樂Pad」讀成「籮Pad」，你都咪話唔搞笑。
絲絲認為，唔理乜「Pad」都好，賣得好就係好「Pad」啦！據聯想高級副總裁、產品集團總裁劉軍話，與iPad及iPhone嘅關係一樣，「樂Pad」外觀似係一部大碼嘅「樂Phone」，聽講「樂Pad」會與「樂Phone」喺郵件、網絡瀏覽等方面深度融合，絲絲都好想睇吓「樂Pad」同iPad嘅像真度有幾高。
余絲韻