期指觀瀾：小注建好倉先看20370
用兩句可以總結尋日港股市況：「上午應跌唔跌，下午應升唔升。」港股尋日跌159點報20,090點，期指報20,026點低水64點，大市成交437億元是七月七日以來最低紀錄。
美股上周五下跌，結果期指開19,998點，只係開低187點，而且十點十五分前，已重返20,000點樓上，相信唔少周末揸重貨嘅都慶幸輸得少。到午市A股抽升，港股卻未有跟隨，反而藉穆迪調低愛爾蘭政府債券評級的消息，唔跟外圍升勢，三點半居然可以再穿20,000點，無論做好做淡，恐怕雙方都不容易判斷尋日市況，是強？是弱？
從歐元在愛爾蘭被降級後，先跌後急升，歐股早段走勢亦無大礙，今浪帶頭跌的港股，似乎對外圍的不利消息有杞人憂天之嫌，有機會藉A股而轉勢回升。筆者一直等待測試19,700點支持才決定入市，今日決定提早入市，大前提是收市要守得住19,930點，否則會作止蝕，上望的首個目標是20,370點，其次是20,450點。
John Mullen