絲絲講場：恒生商銀請客蘭桂坊睇世盃
世界盃開鑼後，好多機構都趁呢個機會為客戶或員工搞番啲活動，恒生商業銀行業務處就喺上周五晚於蘭桂坊舉辦「世界盃狂熱」活動，邀請咗超過100名熱愛足球嘅商業銀行客戶，一齊觀賞巴西對葡萄牙嘅精彩賽事。
高層撐場 估波有獎
恒生當然好識做，副總理兼企業及商業銀行業務主管陳力生、商業銀行業務主管林燕勝，以及佢哋嘅客戶關係團隊都嚟撐場陪客戶睇波，絲絲相信佢哋都好樂意咁做，反正喺屋企睇咁靜局，不如同班客戶一齊盡歡，既可以自己娛樂，又可以乘機與客戶搞好關係，簡直一舉兩得。
絲絲聽佢哋講，當晚氣氛都好熱鬧，與客戶打成一片，除咗睇波之外亦有豐富美食。恒生更於當晚搞咗個「眼光獨到」有獎遊戲，邀請客戶喺賽事開始之前競猜球賽結果，呢場賽果都唔係咁易估，唔知有幾多人估中呢？
余絲韻