絲絲講場：任總建行袍金「有限錢」
金管局前總裁任志剛退休之後，首次出任上市公司非執董就揀咗建行（00939），可能同任總與建行董事長郭樹清惺惺相惜有關。尋日建行股東會上，有小股東趁機向郭董問任總會
幾多人工？郭總就解釋話任總係做非執董，冇得支薪，最多只係拎袍金，加埋一啲唔同嘅委員會工作，都只係十零萬，係「有限錢」啫。
小股東咁關心人工，唔知係咪畀貪婪銀行家收巨額花紅嘅新聞嚇親，抑或係驚任總喺建行會收取當年做金管局總裁嘅人工。雖然以前佢份糧係唔細，之不過工作量同埋責任咁大，相比嗰班美國華爾街「賓卡」真係唔算過分。
雖然係問咗咁敏感嘅話題，其實小股東真係好錫郭總為首嘅一班管理層，有小股東仲話，其實唔係好知道建行做成點，但好信任佢哋，仲講咗一大堆期望嘅說話。有股東更加為郭總抱不平，問點解建行盈利表現咁好，管理層仲係要減人工，郭總就話間間銀行唔同，唔可以一概而論。
股東會派50蚊飲食券
股東會唔少得嘅梗係慰勞吓遠道而來嘅小股東喇，不過內銀股散戶眾多，齊齊食點心太麻煩兼混亂。上月絲絲見到工行（01398）股東會一人一盒點心打包拎返屋企，尋日建行仲醒，一人一張50蚊美心飲食券，唔使煩之餘，股東留番嚟買西餅又得，用嚟飲茶又得，有股東笑稱好似收多50蚊股息。
余絲韻