自從行政總裁李小加上任後，港交所（00388）人事變動都唔少，繼財務總監、法律服務部主管等辭職或退休後，尋日又有一名高層宣布離職，佢就係首席科技總監黃國權，將於今年八月底退休，由九月開始，喺有需要時佢仍會就IT策略事宜向港交所提供意見。
眾所周知，科技係港交所其中一項最重要環節，未來港交所要提升第三代自動對盤系統（AMS3.8）及發展新一代交易系統，加上未來交易所之間嘅其中一個主戰場肯定係技術發展，黃國權嘅退休都咪話唔大件事！
絲絲聽聞佢今次退休係因為健康原因，以及想多啲時間陪屋企人。黃國權辭職後，港交所已有新安排，佢嘅副手即現任資訊技術科副主管周騰彪將接任首席科技總監，並會採用「雙頭馬車」制，即周氏將與現任上市營運事務主管李國強共同掌管資訊技術科。
港交所尋日亦公布，將現貨市場及衍生產品市場兩個部門合併為全新嘅交易科。現任衍生產品市場部主管戴志堅將委任為交易科主管，現任現貨市場部主管葉志衡將出任集團副營運總裁；至於今年二月新成立嘅市場發展科將會有4名新人加入。
余絲韻