今年香港嘅職場旺咗好多，見到好多人都轉工，有咁啱得咁蹺，滙豐與恒生呢兩母子嘅保險業務阿頭都雙雙離巢。
聽講滙豐嘅香港保險業務董事總經理石湛森（Jason）早喺上月已經走人，不過就好似冇乜人知，佢仲係要即時離開嗰隻，事關佢要跳槽到競爭對手，所以唔即時起身都唔得，有傳佢會過檔到ING，不過仲有待證實。講開Jason，佢都喺滙豐做咗約17年，當年滙豐推強積金都係由佢做開荒工作，佢跟住就調咗去新加坡，○七年又調返嚟香港。
恒生保險嘅CEO李哲恒（Alvin）亦喺上月中離職，好似話又係轉工，佢嘅工作由胡福華（Calvin）接手，佢哋兩人嘅英文名都有啲相似，唔知做事作風又似唔似呢？絲絲收到風，Calvin其實係滙豐保險嘅舊將，喺恒生做事應該好易適應，因為恒生裏面都有好多滙豐舊人。
余絲韻