一條華爾街值幾多錢？相信會係一個天文數字，雖然經歷金融海嘯後，華爾街投行頭上嘅光環已消失，但市值仍係可觀數目，加上股價變動，秒秒鐘都可以大上大落，確係唔易計。不過，見證住呢條街甚至全球經濟興衰嘅一個華爾街路牌，尋日就以11.65萬美元成交，即係超過90萬港元。
其實呢個路牌自十九世紀初已屹立喺華爾街，置於摩根大通一九一四年嘅前總部門前。據介紹，呢個路牌上面有少少瑕疵，相信係一九二○年炸彈襲擊嘅碎片所造成，真係別具歷史意義。
呢個路牌原本由一位收藏家持有，並存放喺距離路牌原來位置不遠處嘅博物館。紐約佳士得拍賣行冇透露路牌買家係邊個，而拍賣行原先估計成交價介乎6萬至8萬美元，所以依家係「超額完成」，證明歷史有價。唔知香港天星碼頭個鐘樓，若干年後如果攞出嚟拍賣，又值唔值錢呢？
余絲韻